Johan van der Merwe (1950 - 2012) was 'n Afrikaanse akteur. Hy het die rol van Jan in Nommer asseblief, een van die eerste Afrikaanse TV-reekse, vertolk. Hy het ook in rolprente soos Lipstiek Dipstiek en Hoofmeisie opgetree en was die stem van die verkleurmannetjie in Nuustak. Van der Merwe het ook die rol van Gert Lubbe in Radio Sonder Grense se Stralerjakkers vertolk. Van der Merwe is op die ouderdom van 62 oorlede. Hy is 'n maand vantevore in die hospitaal opgeneem na 'n hartaanval wat erge skade aan sy hartspier aangerig het. Hy laat 'n seun, 'n dogter, twee kleinkinders asook 'n lewensmaat agter.